Шымкентте «Гарант 24 ломбард» ісі бойынша жәбірленушілер наразылық білдірді

25 сәуір күні Шымкент қалалық сотының алдына жиналған отызға жуық адам наразылық білдіріп, Ақтөбе соты «Гарант 24 ломбард» ісін созбалаңға салып жатыр деп айыптады. Олар соттан айыпталушылардан жәбірленушілерге ақшасын өндіріп беруді талап етті.

Айдар Түймебаевтың айтуынша, «Гарант 24 ломбард» қаржы пирамидасына Шымкенттен мыңнан аса адам ақша салған. Арасында 62 млн теңге салған адамдар бар. Бірі үйін, көлігін сатқан, енді бірі банктен несие алып берген. Бірақ үш жыл бұрын бұл қаржы пирамидасы деп танылып, жабылған. Іс сотқа өткеннен кейін салымшылар қиналған. Бірі несиесін жаба алмай үйінен айырылған, бірі қарызын өтей алмай денсаулығынан, кейбірі ажырасқан, қайтыс болғандар да бар.

«Банктен несие алып 3 млн 200 мың теңге салдым. Қазір жалаңаяқ қалдым. Қаржы пирамидасы жабылды дегенді көтере алмай кейбір адамдар қайтыс болып кетті. Солардың ақшасы қайтарылмайтын болып жатыр. Ақшамызды қайтаруды сұрап бармаған жеріміз қалмады», - дейді Түймебаев.

Жиналғандар тергеу кезінде жәбірленуші болып танылғанымен, сот процесі басталғанда іске қатыса алмағанына налиды.

«8 790 000 теңге ақша салдым. Сеніп қалдық қой. Біз сияқты 14 қаладан 43 мыңға жуық адам алданған екен. 54 миллиард теңге жиналған. 48 айыпталушы бар дейді. Осынша жұрт алданғанда құзырлы органдар қайда қарады? Ақшамызды қайтарсын, не айыптаушыларға ұзақ мерзімді түрме жазасы кесілсін» , - деді жиналғандар ашуланып.

Ақтөбе қалалық соты жәбірленушілерді сот отырысы таңғы сағат 10:00-де басталады деп шақырған. Бірақ судьясның сырқаттанып қалуына байланысты іс түстен кейінге қалған.

Шымкенттік салымшылар іске онлайн қатысып жүр.

Жиналғандардың ішінде зейнеткерлерден бастап қолына шаранасын ұстап алған әйелдер де бар. Олар түстен кейін болады деген сот процесі басталғанша 5 сағат сот ғимаратында күтуге мәжбүр болды.

Сот прцесі басталған соң, тұрғындарды онлайн іске қосты. «Гарант 24 ломбард» 3 жыл бұрын қаржы пирамидасы деп танылып, оны ұйымдастырған және басқарған адамдардың үстінен іс қозғалған.