Шымкентте ер адамды тергеген үш полицей жауапқа тартылды

Шымкент қалалық полиция департаментінде тергеу кезінде көз жұмған Нұрболат Жұмабаевтың ісі бойынша үш полицей жауапқа тартылды.

Шымкент қалалық мамандандырылған тергеу сотында Нұрболат Жұмабаевтың ісі қаралып, екі подполковник пен бір полковник тергеу аяқталғанша екі айға қамауға алынды.

Еске салсақ, 8 желтоқсанда Шымкентте тергеу кезінде 31 жастағы ер жігіт көз жұмған. Бұл іс ҚР Қылмыстық кодексінің 106-бабы бойынша тіркелген. Күдікке үш лауазымды полицей іліккен. 

Артынша Полиция департаментінің бастығы қайтыс болған жігітке полицейлер күш көрсеткенін мойындаған. Алты полицей ішкі істер органдарынан жұмыстан шеттетілген. Үшеуі қазір күдікті ретінде ұсталған.

Марқұм Нұржанның әкесінің адвокаты Талғат Есімов жұмыстан шеттетілген алты полицей де жауапқа тартылуы керектігіне сенімді.

«Алты полицейдің үшеуінің үстінен іс қозғалды. Мен қалған полицейлердің де, сонымен қатар мынау СОБР (жедел әрекет ету арнайы жасағы) қызметкерлерінің де үстінен қылмыстық іс қозғалуы керек деп есептеймін. Бұл бойынша прокуратураға талап-арыз бермекпіз. Сондай-ақ осы оқиғадан кейін департамент бастығы өз қызметінен кетуі керек деп есептейміз. Бұл бойынша Президент әкімшілігі, Бас прокуратура мен тергеу тобына алдағы күндері шағым жібереміз» деді адвокат.