Шымкентте ер адам аттракционнан құлап кетті

Шымкентте ер адам аттракционнан құлап кетті, деп заңгер Евгений Яворский әлеуметтік желіде хабарлады.

Оның айтуынша, ер адам құзға өрмелеу кезінде аттракционнан құлап кеткен. 

«10 сәуір күні кешке Шымкент қаласындағы Бәйдібек Би көшесіндегі Жайлаукөл саябағында қайғылы оқиға орын алды. 20 жастағы жігіт құзға өрмелеу кезінде аяғы тайып, құлап түсті. Көктем басталып жатыр. Тұрғындар ойын-сауық саябақтарына, су қоймаларына барады. Қайғылы жағдайлардың алдын алу үшін барлық техникалық құралдарға толық ревизия жүргізу керек» деп жазды заңгер.

Шымкент қалалық денсаулық сақтау басқармасы ұсынған мәлімет бойынша ер адамның жағдайы ауыр, қазір комада.

«10 сәуірде жедел жәрдем қызметіне саябақтан ер адамның биіктен құлап, жарақат алғаны туралы хабарлама түсті. Оқиға орнына келген медицина қызметкерлері науқасқа алғашқы медициналық көмек көрсетіп, оны №1 қалалық клиникалық ауруханаға жеткізді. Тексеру кезінде науқастың маңдай аймағының жыртылғанын анықталды. Хирургиялық ем жүргізілді. Науқастың жағдайы ауыр, ол жансақтау бөлімінде жатыр» делінген хабарламада. 

Шымкент қалалық полиция департаменті оқиға бойынша сотқа дейінгі тергеу жұмыстары басталғанын хабарлады.

«2022 жылдың 10 сәуірінде Бәйдібек би көшесіндегі аттракциондар саябағында орын алған жайт бойынша Әл-Фараби ауданы Полиция басқармасының қызметкерлерімен ҚР Қылмыстық кодексінің 306-бабының 1-бөлігі бойынша (тұтынушылар өмiрiнiң немесе денсаулығының қауiпсiздiгi талаптарына сай келмейтiн жұмыстарды орындау не қызметтер көрсету) қылмыстық іс тіркелді. Қазіргі таңда сотқа дейінгі тергеп-тексеру жұмыстары жүргізіліп жатыр, істің барлық мән-жайы анықталатын болады» деді полиция.