Шымкентте дәмханалардың бірінде атылған оқтан жараланған адамға ота жасалып жатыр

7 қазанға қараған түні Шымкенттегі «На небе» дәмханасында атыс болып, бір адам жарақат алды. Бұл туралы телеграмм каналдардың бірінде хабарланды.

Қалалық денсаулық сақтау басқармасы Orda.kz тілшісіне жарақат алған адамға ота жасалып жатқанын мәлімдеді.

- 1988 жылы туған адам ауыр хәлде қалалық №1 клиникалық ауруханаға жеткізілген. Медициналық көмек көрсету кезінде науқастың жүрегі бірнеше рет тоқтап қалған. Жағдайы ауыр, - дейді басқарманың баспасөз хатшысы Лаура Нахыпқызы.

Дәрігер-хирург Талғат Шауеновтың айтуынша, оқ ішіне, қуығы мен санына тиген. Бірнеше ота жасалған. Қазір жағдайы ауыр.

Полиция оқиғаның болғанын растады. Оқиғаға байланысты Қылмыстық кодекстің «Адам өлтіруге оқталу» бабымен қылмыстық іс қозғалған. Оқ атқан күдіктілер оқиға орнына қаруы мен Ресей нөміріндегі жеңіл көлікті тастап, өздері қашып кеткен.