Шымкентте ардагерлер шахмат ойнайтын орталық ашып беруді сұрайды

Шымкенттегі бір топ ардагер қала әкімдігінің орталық саябақтағы шахмат ойнайтын орталықты жауып, жаңасын ашып бермегеніне қарсы шықты.

Қала тұрғыны 85 жастағы Күндебек Төребековтің айтуынша, ардагерлер шахмат ойнайтын орталық ашып беруді сұрап қала әкіміне бірнеше рет хат жолдаған.

— Әрқайсымыз әр жерде тығылып шахмат ойнап жүрміз. Миллион тұрғыны бар қалада қариялардың басын қосатын орталық ашып беруге болады ғой. Өтінішіміз, бізге нақты іс, тірлік керек. Орын бөліп қарттардың басын қосатын орталық ашып берсін,- дейді ол.

«Ақтұлпар» ардагерлер шахмат клубының директоры Нұрман Қонышбеков екі жыл бұрын қала әкімдігі Орталық саябақтағы ардагерлер орталығын бұзып, Пушкин кітапханасынан орын беруге уәде еткен. Содан бері ардагерлер далада қалған. Қазір қарттар күн жылыда көшеде шахмат ойнайды, күн суытқанда саябақтарға жақын кітапханаларды жағалайды.

Әл Фараби ауданының әкімі Рашид Мыңбаев қариялардың өтінішімен таныс. Ол қарттарға шахмат орталығын ашу үшін мемлекеттік мекемелерден бөлме қарастырып жатқанын айтады.

— Бұл мәселе туындағанына бір жылдай уақыт болды. Бұрынғы орталық № 8 гимназия жанында болған. Орталық мектептің қосымша ғимараты салынуына байланысты жабылды,- дейді аудан әкімі.

Авторы: Дилара Иса, Шымкент