Шымкентте қаңтардағы тәртіпсіздіктер кезінде қару ұрлағандар ұсталды

Шымкенттегі полицейлер Алматыдағы тәртіпсіздік кезінде қару ұрлаған күдіктілерді ұстады.

Бұл туралы қалалық полиция департаменті тергеу бөлімінің бастығы Дәулеткелді Әбдіраманов айтты.

Спикердің айтуынша, жедел-іздестіру шаралары барысында қаңтар оқиғасы кезінде Алматыдағы дүкендердің бірінен қару ұрлаған үш күдікті ұсталды. Олардың екеуі оңтүстік астанада жалдамалы пәтерде тұрса, үшіншісі бұрынғы достарына қонаққа келгені анықталды. Қару-жарақ дүкені тұрғын үйдің бірінші қабатында орналасқандықтан, жас жігіттер жағдайды пайдаланып, ұрлық жасауды ұйғарған.

– Дүкеннен қолға түскеннің бәрін алып, Шымкентке із жасыру үшін кеткен. Жігіттер екі «Сайга» аңшы мылтығы мен 70 патронды сатып үлгерген. Оларды да жедел қызметкерлер ұстаған. Ал ұрылардың бірі винтовканы сақтап қойған. Аталған факті ҚР Қылмыстық кодексінің 291-бабы «Қару ұрлау» бойынша ҚР ҚК-не тіркелді. Күдіктілердің үшеуі де Түркістан облысының тұрғындары. Қазір олар қамауда, – деп қосты Әбдіраманов.

Сондай-ақ басқарманың бас тергеушісі полиция қаңтардағы тәртіпсіздік кезінде ұрланған қаруды анықтау бойынша жедел-іздестіру жұмыстарын жалғастырып жатқанын атап өтті. Еске салайық, заңсыз сақталған қару-жарақ, оқ-дәрілер мен жарылғыш заттарды өз еркімен тапсырғандар, егер олардың әрекеттерінде басқа қылмыстар болмаса, қылмыстық және әкімшілік жауапкершіліктен босатылады.