Шымкентте 60 шетелдік еңбек құлдығында болды

Алматыда полицейлер құтқарған Өзбекстан азаматының оқиғасы жалғасын тапты. Шетелдік қашып кеткен Шымкенттегі зауытты тексеру кезінде оның еңбек құлдығында отырған 60-тан астам жерлестері табылды.

Кәсіпорын иелері Өзбекстан азаматтарының құжаттарын алып, жалақыларын бермей, мезгіл-мезгіл ұрып-соғатын болған.

Бұған дейін  Өзбекстан азаматы ағасының ұрланғаны туралы полицияға арызданған. Оның айтуынша, белгісіз біреулер ер адамның ізіне түсіп, BMW көлігімен ұрлап кеткен.

Әйел оның Шымкенттегі кірпіш зауытының бірінің қожайындарынан қашып кеткенін, ол жерде еңбек құлдығында ұсталғанын хабарлады. Қазіргі уақытта үш кәсіп иесі ұсталды.

«Екі зауыт аумағынан Өзбекстанның 60-тан астам азаматы табылды. Сотқа дейінгі тергеп-тексеру барысында оларды зауытқа жұмысқа шақырып, кейіннен құжаттарын алып, жалақыларын бермей, мерзімді түрде физикалық күш көрсетіп, қорқытқаны анықталды. Шымкент қаласы мен Түркістан облысының тұрғындары ұсталды. Олардың екеуі ағайынды» делінген полиция хабарламасында.

Полиция 25 шетелдік жұмысшы «Сана сезім» үкіметтік емес ұйымының қарауында екенін, 30-дан астам азаматтың жеке басын куәландыратын құжаттары болмағандықтан қабылдау бөліміне орналастырылғанын айтты.

Күдіктілерге қатысты ҚР Қылмыстық кодексінің 126-бабы «Еңбекті қанау мақсатында бас бостандығынан заңсыз айыру» және ҚР ҚК-нің 389-бабы бойынша сотқа дейінгі тергеу амалдары жүргізілуде. Сараптама тағайындалды.