Карантин: Шымкентте 200 адамдық той тоқтатылды

Шымкентте 200 адамға арналған «Сүндет тойды» мониторингтік топтың қызметкерлері тоқтатты.

Бұл туралы Orda.kz ІІМ қалалық полиция бөлімінің баспасөз қызметіне сілтеме жасап хабарлайды.

Биылғы 6 шілдеде полиция қызметкерлері мобильді топпен бірге Шымкент қаласындағы кәсіпкерлік нысандарында карантиннің сақталуын бақылау мақсатында рейдтік іс-шара өткізді.

– Тексеру барысында Абай ауданының Арғынбеков көшесінде орналасқан мейрамханада тұрғындардың «сүндет тойын» өткізіп, көп адамдардың жиналғаны анықталды. Тойға шамамен 200 адам келген. Тәртіп сақшылары түсіндіру жұмыстарын жүргізіп, жиналғандарды таратты. Мекеме әкімшісінен және мерекені ұйымдастырушыдан түсінік хаттар алынды. Жиналған материалдар ҚР ӘҚБтК-нің 425-бабы бойынша әкімшілік шаралар қолдану үшін тиісті мекемеге жіберілді , - деп хабарлады қалалық полиция бөлімінің баспасөз қызметі.