Шымкент тұрғыны өртеніп жатқан үйден көршісінің алты баласын құтқарды

Шымкент тұрғыны Марина Гафарова үйінің терезесінен өрт шыққанын көріп, кейін үйде қамалған балалардың көмек сұраған дауысын естіп, оларға көмектесіп, құтқарып қалды.

Гафарова әйнекті сындырып, өртеніп жатқан көршілерінің үйіне жүгіріп кіріп, алты кәмелетке толмаған баланы аман алып қалды. Құтқарушылар әйелді батылдығы үшін марапаттады.

Маринаның өзінің де 4 баласы бар. Ол өртті көргенде жалаңаяқ үйден жүгіріп шығып, үш метрлік қоршаудан секіріп кеткенін айтады. Ал үйдегі газ баллонын байқаған ол күйеуін көмекке шақырған.

«Мен балалардың жылаған дауысын естіп, жүгіріп шықтым, үйлеріміз бір-біріне өте жақын. Үйде кез келген сәтте жарылып кетуі мүмкін газ баллоны болған», - деді Гафарова.

Айта кетейік, өрт 16 желтоқсан күні түнде болған. Анасы балаларын жалдамалы үйге жатқызып, кетіп қалған. Осы кезде өрт шыққан. Қуанышқа орай, балалардың барлығы аман қалды. Қараусыз қалған балалар ұйықтамай, отпен ойнап жүрген болып шықты.

Белгілі болғандай,  Марина құтқарушылар үшін ең жоғары марапат – өрт кезіндегі ерлігі үшін медалін алады деген үміт бар. Қалай болғанда да, барлық құжаттар министрлікке жіберіліп қойған. Әйелдің айтуынша, оның орнында болса - кез келген адам дәл солай істейтін еді.