Шымкент тұрғыны екі полиция көлігін қағып кетті

BMW маркадағы көлік мінген Шымкент тұрғыны екі патрульдік көлікті қағып кетті, деп хабарлайды Orda. Polisia.kz-ке сілтеме жасап.

Әлеуметтік желілерде полицияның қызметтік автокөліктерінің қатысуымен жол-көлік оқиғасының видеосы таратылуда.

Жол көлік оқиғасы 14 наурызда Ордабасы ауданының аумағында, республикалық маңызы бар Шымкент-Самара тас жолында орын алды.

Түркістан облысы ПД ЖПҚ патрульдік полиция қызметкерлері магистральды жолдың 49-50 шақырымында қолайсыз ауа райында көліктердің қауіпсіз қозғалысын қамтамасыз еткен. Бұл уақытта мегаполистен Түркістанға бара жатқан BMW жүргізушісі Шымкент тұрғыны көктайғақ салдарынан көлікті басқара алмай, жол бойында тұрған патрульдік полициясының екі қызметтік Kia Rio көлігін соқты.

Бұл фактіні полиция Ордабасы АПБ-да тіркеді. BMW жүргізушісіне қатысты ҚР ӘҚБтК-нің 610-бабы 1-бөлігі «көлік құралдары жүргізушілерінің жол жүрісі қағидаларын адамдардың денсаулығына зиян келтіруге, көлік құралдарының немесе өзге де мүліктің бүлінуіне әкеп соққан бұзушылығы» бойынша әкімшілік хаттама жасады.

Қаза болғандар мен зардап шеккендер жоқ. Жүргізушілер медициналық куәландырудан өтті.