Шымкент соты жүкті әйелін ұрып-соққан адамға ескерту берді

Шымкенттегі қалалық мамандандырылған ауданаралық соты азаматтық некедегі әйелін ұрып-соққан адамға ескерту берді.

Бұл туралы Orda.kz тілшісі хабарлайды.

18 жастағы жәбірленушінің аяғы ауыр. Сот істі Әкімшілік кодекстің «Отбасы-тұрмыстық қатынастар аясындағы құқыққа қарсы әрекеттер» бабымен (73-бап) қарады. Істе жәбірленуші мен айыпталушы жауап берді.

Жәбірленуші Қожабектің (аты-жөні толық жазылмайды – ред.) арыздануынша, 24-25 наурыз күні азаматтық некедегі күйеуі Мансұр Алтынмен өзара жанжал болған. Жанжал кезінде күйеуі аяғы ауыр екеніне қарамай денсаулығына қасақана жеңіл дәрежелі зиян келтірген. Төркініне алып барған. Автокөлігінің есігін ұстап тұрғанда көлікті жүргізген. Нәтижесінде әйел құлап, жарақат алған.
Күдікті Мансұр Алтын шағыммен келіспейді. Ол жанжал болғанын растайды. Бірақ қасақана ұрып-соқпағанын, абайсызда итеріп жібергенін айтады.

Дауға байланысты сот-медициналық сараптама тағайындалған. Сараптама қорытындысы бойынша, Қожабектің иығы көгергені, оң тізесі мен білегі, алақаны мен табаны сырылғаны анықталған. Автокөлік оқиғасынан жарақат алғаны нақтыланған.

Сотта әйелі де, күйеуі де бір-бірімен татуласудан бас тартты. Сот Қожабектің шағымы дәлелді деп тауып, Мансұр Алдынға ескерту берді.

Автокөлік оқиғасының болғаны сотта анықталған соң полиция Мансұр Алтынға жол жүру қағидасы талаптарын бұзғаны үшін бөлек іс қозғалатынын мәлімдеген.