Шымкент мешіттерінің біріндегі намаз төбелеске ұласты

Әлеуметтік желіде ер адамдардың бірі мешітте отырған екіншісіне кенеттен соққы жасағаны түсірілген видео тарап жатыр.

Намаз кезінде ер адам қатты соққымен қасында құлшылық етіп жатқан жігітті ұра бастаған.

Желі қолданушылары агрессия жігіттің дауыстап айтқан «әумин» сөзінен басталды деп болжайды. Оқиға 12 мамырда Шымкентте жамағатпен намаз оқылып жатқан кезде болған.

Ведомствоның мәліметінше, сол кезде мешітте болған бір топ келушілер намаз оқу тәртібін бірнеше рет бұзған.

Өзге өңірден Шымкент қаласына келген бір топ азамат мешіт имамының ескертуіне қарамастан бірнеше рет жамағат намазын бұзған. Өзге мәзһабта намаз оқыған олар жамағат пен имамның өтінішіне құлақ аспай, мешіт ережесін өрескел бұзды. 

Намаз кезінде «әумин» сөзін қатты дауыспен айтқан жандардың әрекетіне төзбеген мешітке тұрақты келуші бір азамат олардың біріне қол жұмсаған. Нәтижесінде имам жамағат намазын тоқтатуға мәжбүр болған. Төбелес дер кезінде тоқтатылып, полиция қызметкерлері тиісті жұмыс жүргізуде. 

Қазақстан мұсылмандары діни басқармасы мешітке келетін жамағатты мешіт ережесіне бағынуға, сонымен қатар құлшылық үйінде сабыр сақтап, көркем мінез танытуға шақырады.