Шымкент қалалық №1 ауруханада 26 науқас жатыр, олардың барлығына оқ тиген. Бұл туралы Шымкент қаласы №1 аурухана басшысының бірінші орынбасары Мұхан Шыңғысханұлы Orda.kz журналисіне айтты.
Мұхан Шыңғысханұлы 5 қаңтарда болған тәртіпсіздіктерден кейін ауруханаға түскен азаматтар туралы ақпаратында науқастардың басым бөлігі жастар екенін жеткізді.
«26 науқас жатыр, оның екеуі әскери қызметші (біреуі келісімшарт негізінде жұмыс істейтін солдат, біреуі тәртіп сақшысы), қалғаны бейбіт тұрғын. Бәріне оқ тиген. Хәлі ауыр бір науқас жансақтау бөлімінде. Дүйсенбі 3 адам палатаға ауыстырылды. Әртүрлі оқтан жараланған, бейбіт тұрғындардың басым бөлігі жас балалар, ең үлкені 34 жаста. Сөздеріне қарағанда, алаңға жағдайды көруге барған» деді тілшіге берген сұхбатында.
Оның айтуынша, «травматология бөлімінде – 13, хирургияда – 9, нейрохирургияда – 3 адам және бет-жақ хирургиясы бөлімінде біреуі емделіп жатыр. Ота жасалатындар да бар. 10 қаңтар ауруханадан 4 науқас шығарылды.
Сонымен қатар, қалалық денсаулық сақтау басқармасының баспасөз хатшысы Лаура Нахыпқызы қазір ауруханада құқық қорғау органының 2 қызметкері жатқанын растады. Оның бірі жауынгер, екіншісі полицей.
Басқарма ұсынған мәлімет бойынша, наразылық кезінде жалпы 120 адам медициналық көмекке жүгінген болса, оның 48-і қарулы күштер мен құқық қорғау органы өкілдері. Бүгін қалада 48 адам ауруханада жатыр, 5-і жан сақтау бөлімінде.
