Шымкент әкімімен бірге өткен отырыста құрықталған шенеунік 9 жылға бас бостандығынан айырылды

Шымкент қаласы тұрғын үй басқармасы басшысының орынбасары Азат Момынов сейсмикалық қауіпсіздік жұмыстары деген желеумен бюджет қаражатын жымқырды деп айыпталды.

Жоғарғы соттың баспасөз қызметінің мәліметінше, Момынов 2023 жылы жеке кәсіпкермен бірге көпқабатты тұрғын үйлерді жөндеуге және сейсмотұрақтылығын тексеруге бөлінген 367 миллион теңгеден астам қаражатты ұрлау жолын ұйымдастырды.

Бұл іске қатысқан кәсіпкер мемлекеттік тендерлерді жеңіп алған жалған ЖШС арқылы қаражатты шығарып отырған. Ал жымқырылған қаражатты Момыновтың ата-анасының атына тіркелген монша кешенінің құрылысына инвестициялау арқылы «жылыстатқан».

Сот Азат Момыновтың мүлкін тәркілей отырып, тоғыз жылға бас бостандығынан айырды. Қылмысты мемлекеттік қызметте отырып, мемлекеттік қызметші антын бұзып жасағаны ауырлататын жағдайлардың бірі болды. Ұрлыққа қатысқан кәсіпкер сегіз жылға бас бостандығынан айырылды.

Үкім әлі заңды күшіне енген жоқ. Азат Момынов 2024 жылдың ақпан айында Шымкент қаласының әкімі Ғабит Сыздықбековтың кеңесі кезінде ұсталды. Ұсталған сәттің видеосын әкім өз парақшасында жариялады.