Шымбұлақтағы кезек: демалыс орны әкімшілігі жұмыс кестесін өзгертті

Алматының танымал «Шымбұлақ» тау шаңғысы курортына келушілер 1 қаңтар күні ұзын-сонар кезек пен халықтың көптігіне шағымданды. Аспалы жолға мінгісі келетіндер де тым көп болды. Шымбұлақ әкімшілігі қала тұрғындары мен туристерді мереке және демалыс күндері алдын ала ертерек келуді сұрады, деп хабарлайды Orda.kz.

«НЕХабар» Telegram арнасында жарияланған видеода «Демалыс күнгі Шымбұлақ - әлсіздердің орны емес» делінген.

Шымбұлақ өкілдері Instagram парақшасында 2 қаңтарда демалыс орны түн ортасына дейін жұмыс істейтінін, күндіз-түні шаңғы тебуге болатынын хабарлады. Тек екі тариф бар - таңғы және толық: 08:30-дан 13:30-ға дейін (таудан түсу 13:30-ға дейін) және 08:30-дан 17:00-ге дейін (00:00 дейін таудан түсу қажет).

Бір жыл бұрын белгілі кәсіпкер, Forbes.kz сайтының басшысы Арманжан Байтасов Шымбұлақтағы кезек туралы өткір айтқан болатын. Артынша ғаламторда халық көп жиналған демалыс орнының видеосы да пайда болды. Байтасовтың айтуынша, шипажайды кеңейту және қосымша шаңғы трассаларын салу бұл мәселені шешуге мүмкіндік беретін еді.