Шылым ұстап бензин құймақ болған Петропавл тұрғыны жансақтау бөліміне түсті

Петропавлда қолына шылым ұстап тұрып, бензин құймақ болған адам жансақтау бөліміне түсті. Науқастың жағдайы туралы облыстық денсаулық сақтау басқармасы хабарлады. Қазір 30 жастағы ер адам өте ауыр халде қалалық көпсалалы аурухананың жансақтау бөлімінде жатыр, деп хабарлайды Orda.kz.

Ведомство мәліметінше, ол канистрадан бензинді дәнекерлейтін темір құтыға құюға тырысқанда күйік алған.

«Оқиға кезінде ер адамның қолында тұтанған шылым болған. Жарылыс болып, киімі өртенген. Зардап шеккен адам шұғыл түрде бірден аурухананың  жансақтау бөліміне жеткізілді», – деді облыстық денсаулық сақтау басқармасының баспасөз қызметі.

Алдын ала деректерге сәйкес, науқастың басы, денесі, аяқ-қолдары және тыныс алу жолдары күйіп қалған. Сондай-ақ ІІ–ІІІ дәрежелі күйік шалу диагнозы қойылған. Қазір ол өкпені жасанды желдету аппаратына қосылған. Дәрігерлер оның жағдайын өте ауыр және тұрақсыз деп бағалап отыр. Медициналық көмек барынша көрсетіліп жатыр.