Шығыс Қазақстан облысындағы тас жолды ірі қар көшкіні жауып қалды

Шығыс Қазақстан облысының Ұлан ауданында Өскемен – Самара облыстық тас жолының 101-ші шақырымында қар көшкіні жолды жауып тастады, деп хабарлайды Orda.kz ҚР Төтенше жағдайлар министрлігіне сілтеме жасап.

«Қазселденқұтқару» мәліметінше, қалың қар жауып, желдің күшеюі салдарынан көлемі 370 текше метр болатын қар көшкіні өздігінен болған.

Құрбандар мен қираулар жоқ. Жолды «Облшығысжол» жасағы тазартты.  

Шығыс Қазақстан облысының таулы аймақтарында 17-20 қаңтар аралығында қар көшкіні жүру қаупі жарияланды. Төтенше жағдайлар министрлігі тауда жаяу серуендеуден бас тартуды ұсынады.

Құтқарушылар сонымен қатар тау етегіндегі жол бойында қар көшкіні жүретін аймақтардың көп қалыптасқанын да ескертеді. 

Осындай аймақтан өтіп бара жатсаңыз, қауіпті аймақтан мүмкіндігінше тезірек өтіп кету керек.