Шығыс Қазақстан облысында балабақша есепшісі миллиондар жымқырған

Шығыс Қазақстан облысында прокурорлар балабақшадағы бюджет қаражаты ұрланғанын анықтады.

«Катюша» балабақшасындағы штаттық кесте мен банк шоттарын тексергеннен кейін, балабақша есепшісіне үш жыл бойы жалақысы мен сыйақысы бойынша артық қаржы есептелгені белгілі болды.

Ол барлығы 12 миллион теңгеден астам қаражат жымқырған.

Аудандық прокуратура сотқа дейінгі тергеп-тексеруді бастап, одан әрі іс жүргізуді Сыбайлас жемқорлыққа қарсы қызметке өткізді.

Есепші өз кінәсін мойындап, келтірілген шығынды толық өтеп берді.

«Соттың 2024 жылғы 30 сәуірдегі үкімімен сеніп тапсырылған бөтен мүлікті аса ірі мөлшерде ысырап ету және жымқыру (ҚК 189-бабының 3-бөлігі) бабымен кінәліге өмір бойына белгілі бір лауазымдарды атқару құқығынан айыру арқылы 3,6 жылға бас бостандығын шектеу жазасы тағайындалды» деп хабарлайды ШҚО прокуратурасы.

Сот актісі заңды күшіне енді.