Шыңжаңдағы жақындарын қайтаруды талап еткендерге айыппұл салынды

Нұр-Сұлтан соты  Қытай елшілігі алдында туыстарын қайтаруды талап етеміз деп қамауға алынған оншақты адамға «Бейбіт митинг өткізу заңын бұзу» (Әкімшілік кодекстің 488-бабы, 6-бөлімі) бойынша  айыппұл салды.

Бұл туралы  Orda.kz  қалалық соттың баспасөз қызметіне сілтеме жасап хабарлады.

Елшілік алдына топтасқан Халида Ақытханға 30 айлық есептік көрсеткіш (87,5 мың теңге немесе 206 доллар), Жәмила Мәкенге, Гүлбаран Өмірәліге, Байболат Күнболатұлына, Гүлнұр Қосдәулетке, Алмахан Мырзанға, Нұрзат Ермекбайға, Гүлпиям Қазыбекке, Ақиқат Қалиоллаға 50 айлық есептік көрсеткіш көлемінде (145 мң теңге немесе 340 доллар) айыппұл салынды.

Бұл туралы 24 қыркүйекте қалалық соттың баспасөз қызметі хабарлады.

Баспасөз қызметі сот Халида Ақытханға, Жәмила Мәкенге, Ақиқат Қалиоллаға жеңілдік жасап, айыппұл көлемін 30 пайызға қысқартқанын мәлімдеді. Оларға тағылған айып  «бейбіт жиын өткізу тәртібін бұзу» (Әкімшілік кодекстің 488-бабы, 6-бөлімі) болып отыр.

Алматы қаласында Шыңжаңдағы туыстарын қайтаруды талап етіп жүргендер  апта басында  Нұр-Сұлтанға келген.   Олар осы наразылық акциясын ақпан айында Алматыда бастаған болатын. Олар 200 күн бойы, күн сайын Алматыдағы Қытай консулдығы алдында  Шыңжаңдағы туыстарын Қазақстанға жіберуді сұраған. Олар жеті айдан астам бері, қона-түней жүріп акция өткізсе де  Қытай консулдығынан ешқандай  жауап болмағанын айтады.