Шыңжаң қазағы Ерсін Еркінұлы қамаудан босатылды

7 желтоқсанда Шыңжаң қазағы Ерсін Еркінұлы қамаудан босатылды. Естеріңізде болса, ол қазан айында "шекараны заңсыз кесіп өтпек болды" деген айыппен Украинада ұсталған болатын.

Ерсіннің сөзінше, дүйсенбі күні Львов соты оның апелляциялық шағымын қараған. "Право на защиту" ұйымы адвокатының айтуынша, оған елден шығару туралы сот шешімі шыққан. Алайда ол бірінші инстанциядағы осы шешімге шағым түсіріп, сот Ерсіннің өтінішін қанағаттандырған.

"Босқын мәртебесін сұрағандықтан мені осында босқындар лагеріне жіберуі де мүмкін еді, бірақ мен өзім шағымданып жатып, қамаудан шықтым. Мен украин, орыс тілін білмеймін. Сондықтан да осында тіл меңгеруді қолға алатын шығармын", - деді Еркінұлы.

Босқын мәртебесін сұрау туралы өтінішті Украина билігі бір жыл аралығында қарайды.

«23 жастағы Ерсін Еркінұлы осыған дейін өзін Қытайға депортациялауы мүмкін екенін айтып, БАҚ-тан көмек сұраған. "Қытайға қайтсам, мені түрме мен азап, қорлық, өлім күтіп тұр. Сондықтан мені Қазақстанға алып кетіңіздерші», - деген еді видеомәлімдемеде Ерсін.

Қазақстан азаматтығын ала алмаған қандасымыз Түркияға онан әрі Еуропаға өтіп, Киевтің Борисполь әуежайына келгенде құжаттарын жоғалтып, артынша украин шекарашыларының қолына түскен. Оған Львов облысында "шекараны заңсыз кесіп өтпек болғаны үшін" деген айып тағылып, айыппұл салынған.

Қытайдағы қысымға шыдамай Шыңжаң аймағынан бірнеше этникалық қазақ қашып келген.

БҰҰ-ның есебінше, 2017 жылдан бастап Шыңжаңда тұратын бір миллионға жуық ұйғыр, қазақ, қырғыз және басқа да мұсылман "қайта саяси тәрбиелеу" лагерьлеріне қамалған. Куәгерлер ол лагерьлерде азаптау, қысым жасау, зорлық-зомбылық, мәжбүрлі түрде жұмыс істету сияқты адам құқығын өрескел бұзу фактілері барын айтады.