Шығыс Қазақстанда жаңа туған нәресте ауруханада көз жұмды

Шығыс Қазақстан облысы Шемонаиха ауданындағы ауруханада жаңа туған нәресте көз жұмды.

Ақпаратты Шығыс Қазақстан облысының полиция департаменті растап, баланың өліміне қатысты сотқа дейінгі тергеу басталғанын айтты.

«4 қарашада Шемонаиха АІІБ ШҚО Шемонаиха аудандық АІІБ-нің ШЖҚ КГП қызметкерлеріне қатысты абайсызда баланың өліміне әкеп соққан медициналық қызметкерлердің кәсіби міндеттерін тиісінше орындамауы бойынша сотқа дейінгі тергеп-тексеруді бастады» деп хабарлады ШҚО ІІД баспасөз қызметі.

Сондай-ақ департамент қазіргі уақытта қажетті сот-медициналық сараптамалар тағайындалғанын, «істің мән-жайын тергеудің жан-жақтылығын, толықтығын және объективтілігін қамтамасыз ету бойынша тергеу әрекеттері жүргізіліп жатқанын» атап өтті.

Полицейлер қайғылы оқиғаның 2 қарашада болғанын айтты. Бала өлі туылған. Сәбидің ата-анасы полицияға хабарласпаған. Бұл іспен Шемонаиха аудандық ішкі істер бөлімінің қызметкерлері жұртшылыққа мәлім болған соң айналыса бастаған.

Алайда қайғы жұтқан отбасы дәрігердің жоқтығын және баланың денесі өлімнің себебін анықтау үшін сараптаманы 2 күн күтіп жатып қалғанын алға тартты. Салдарынан олар нәрестенің неден көз жұмғанын біле алмай отыр.

Еске салсақ, мұндай қайғылы оқиға Шығыс Қазақстан облысында бірінші рет болып отырған жоқ. Үш апта бұрын Өскемендегі Ана мен бала орталығында босанған әйел Айжан Мержақыпова құрсағындағы баласымен бірге бақилық болған. Олардың өліміне туыстары дәрігерлерді кінәлап отыр.