Шығыс Қазақстанда көліктік бақылау инспекциясы қызметкерлері ұсталды

ШҚО бойынша сыбайлас жемқорлыққа қарсы қызмет көліктік бақылау инспекциясының 11 қызметкерінен құралған қылмыстық топтың қызметін тоқтатты.

Бұл туралы Orda.kz сыбайлас жемқорлыққа қарсы қызметтің баспасөз қызметіне сілтеме жасап хабарлады.

– Қылмыстық схеманы Инспекцияның бір бөлімінің бастығы ұйымдастырған. Шенеуніктер жүктерді тасымалдау саласындағы кәсіпкерлерден жалпы қамқорлық пен аймақта кедергісіз қозғалыс үшін пара алған, - делінген бөлімнің хабарламасында.

Олар 10-50 мың теңге көлемінде пара алған. Оны жүк көлігінің жүргізушілері Инспекция қызметкерлеріне қол алысып амандасу кезінде ұстатып отырған.

– Алынған параның күнделікті ағыны 150-ден 500 мың теңгеге дейін болған, - деді қызмет.

Жалпы 20-дан астам ақша аударымдары анықталды.

– Төрт адам сот шешімімен қамауға алынды. Қалғандары өз кінәсін толық мойындады, - делінген сыбайлас жемқорлыққа қарсы қызмет хабарламасында.