Шығынға ұшыраған кәсіпкерлікті қалай қолдаймыз?

Жаңа шаралар кешені қалпына келтіру динамикасын және іскерлік белсенділікті ынталандыратын экожүйені қалыптастыруды қамтамасыз етуге арналған.

Премьер-министр Асқар Маминнің төрағалығымен ҚР Президенті жанындағы экономикалық өсімді қалпына келтіру жөніндегі мемлекеттік комиссияның отырысы өтті. Мемлекеттік комиссия кәсіпкерлерді қолдау бойынша шұғыл шаралар кешенін мақұлдады, деп хабарлады министрлер кабинеті басшысының сайты.

«Атамекен» АЭС биыл қосымша қолдау шараларының қажеттілігі туралы 50 мыңнан астам кәсіпкерлерге сауалнама жүргізді. Сауалнама нәтижелеріне сәйкес төрт бағыт бойынша 24 іс-шараның қосымша пакеті құрылды.

Жаңа шаралар пакеті 26 ақпанда Мемлекет басшысы Қасым-Жомарт Тоқаевтың төрағалығымен өткен Реформалар жөніндегі жоғарғы кеңесте қаралды.

Қосымша шаралар кешені қалпына келтіру динамикасы мен жаңа экономикалық шындық жағдайында іскерлік белсенділікті ынталандыратын экожүйенің қалыптасуын қамтамасыз етеді. Тікелей іс-шаралар биылғы жылы жалпы ішкі өнімнің 3% өсуіне қол жеткізуге көмектеседі, 3,3 миллионнан астам адамды жұмыспен қамтыған 1,2 миллионнан астам кәсіпкерлік субъектілеріне қолдау көрсетеді.

Премьер-министр Ұлттық экономика министрлігіне үкіметке қолданыстағы заңнамаға тиісті түзетулер пакетін 12 наурызға дейін ұсынуды, Парламент Мәжілісіне 25 наурызға дейін ұсынуды тапсырды.