Швейцарияның ең көне банктерінің бірі Гүлнәр Кәрімованың ісіне қатысты ақшаны жылыстатты деп айыпталды

Өзбекстанның марқұм президенті Ислам Кәрімовтің қызы Гүлнәр Кәрімова Швейцариядағы ең көне банктердің бірі - Lombard Odier арқылы ақшаны жылыстатуы мүмкін, деп хабарлайды Orda.kz Reuters агенттігіне сілтеме жасап.

Швейцария прокурорлары банк пен оның бұрынғы қызметкерлерінің біріне қарсы айып тақты. Прокурорлардың айтуынша, ақша Lombard Odier-те ашылған тоғыз банк шоты арқылы ережелерді бұза отырып аударылған. Бұл қаражат Кәрімова қатысқан қылмыстық ұйыммен байланысты.

Гүлнәр Кәрімова қазір Өзбекстанда түрмеде жазасын өтеп жатыр. Ол бірнеше елдерде, соның ішінде Швейцарияда ұрлық, бопсалау және қылмыстық желі құрды деп айыпталған. Банк өз кезегінде барлық айыптауларды «негізсіз әрі дәлелсіз» деп жоққа шығарды.

Прокуратура банк қызметіне бақылауды күшейткенде ауқымды қылмыстың алдын алуға болар еді деп есептейді.

Бұған дейін Швейцарияда Өзбекстанның экс-президентінің қызына ақша жылыстатқаны үшін айып тағылғаны хабарланған болатын. Швейцарияның бас прокуратурасы Гүлнәр Кәрімова мен оның сыбайластарына қарсы айыптау актісін сотқа жолдап, 480 миллион доллар тәркілеуді  талап етті.