Швейцария халқы қоғамдық орында бетті бүркемелеп жүруге қарсы дауыс берді

Жексенбі күні Швейцарияда өткен референдумға  қатысқандардың көпшілігі қоғамдық орындарда  адамның бет-жүзін бүркемелейтін  киіммен жүруге тыйым салуды қолдап дауыс берген.

 SFR телерадиокорпорациясы мен Tagesanzeiger басылымдары хабарлағандай, бұл  Швейцария конфедерациясының 26 кантоны тұрғындарының 51 пайыздан астамы қолдайтын тыйым болып отыр. Әлеуметтанушылар  дауыс берудің түпкілікті қорытындысы алдын ала есептеу нәтижесінен аса  алшақ болмайды деген болжамды алға тартуда.

Жаппай діни шарадан тыс кездерде қоғамдық орындарда адамның бет-жүзін көлегейлеп, көрсетпейтін заттармен жауып жүруіне тыйым салуды Швейцария халық партиясының оңшыл қанаты  депутаттары көтерген.

Швейцария конфедерациясы конституциясында қоғамдық орында қандай киіммен жүруге болатыны туралы  референдум қорытындысы ресми түрде бекітілгеннен кейін жазылатын болды.

2018 жылғы мәлімет бойынша Швейцарияда  8,6 миллион халық бар. Тұрғындарының 5,3 пайызы ислам дінін ұстанады екен.

Елде  демократиялық  жүйесі аясында референдумдар мен бүкілхалықтың дауыс беру бірнеше ай сайын өтіп тұрады. 100 мың адамның қолдауын тапқан кез келген мәселені дауысқа қоя алады.