Шуда гашиш есірткісінің ірі партиясы тәркіленді

Шуда гашиш есірткісінің  ірі партиясы тәркіленді, деп хабарлайды Жамбыл облысы полиция департаментінің  баспасөз қызметі.

«Жамбыл облысы ІІД Есірткі қылмысына қарсы күрес басқармасының қызметкерлері Шу ауданындағы «Бестаз»  аймағында жүргізген жедел іс-шара барысында Мерке ауданының 37 жастағы тұрғынын ұстады. Жақын маңдағы аумақты тексеру барысында жалпы салмағы 1,215 келі болатын гашиш есірткі  заты салынған полиэтилен пакеті табылып, тәркіленді. Әрі қарай сатуға ыңғайлы болу үшін тыйым салынған зат 74 данадан (әрқайсысы шамамен 20 грамнан) домалақтап оралған», - делінген сенбі күні хабарламада.

Тәртіп сақшыларының айтуынша, әрбір «дөңгелек»  20 дозаға есептелген.

«Ұсталған азамат өз кінәсін мойындап, Шу қаласының уақытша ұстау изоляторына қамалды», - деді Жамбыл облыстық ІІД баспасөз қызметінің жетекшісі Гүлсара Мұхтарқұлова.

ҚР Қылмыстық кодексінің 296-бабының 4-бөлігі (Есірткі заттарды аса ірі мөлшерде заңсыз сақтау) бойынша сотқа дейінгі тергеу басталды.