Шу ауданында 190 келі қарасора тәркіленді

Жамбыл облысы Шу ауданы Алға ауылынан 25 шақырым жерде жабайы қарасора өсірген Шу қаласының тұрғыны ұсталып, нәтижесінде 190 келі қарасора тәркіленді, деп  Orda.kz хабарлайды.

Polisia.kz сайтының мәліметінше, тәркіленген өсімдіктің 188 келіден асатын қарасора екені анықталып, күдікті уақытша ұстау изоляторына қамалды. 

Қылмыстық кодекстің 296-бабы 4-бөлігі бойынша қылмыстық іс қозғалды. Бұл бап бойынша 7 жылға дейін бас бостандығынан айыру жазасы қарастырылады.

Айта кетейік, «Қарасора – 2024»  арнайы операциясы кезінде полицейлер барлығы 597 есірткі қылмысын құрықтаған. Оның ішінде 178 өткізу фактісі, 113 есірткі сақтау фактісі анықталды. Заңсыз айналымнан 16 тоннадан астам есірткі тәркіленді. 13 тонна кептірілген марихуана, 3,6 тонна прекурсор, 83 кг синтетика, 48 кг гашиш, 20 мыңға жуық қарасора бұталары, 76 апиын, көкнәр бұталары  екені анықталды.