«Шпион болған» Ресей дипломаты Астанада жоғары қызметке ұсынылды

Бельгияда елді «шпиондардан тазалау» кезінде күдікке ілініп, еліне қайтарылған ресейлік дипломат Еуропадағы қауіпсіздікке жауап беретін ірі ұйымның Белградтағы миссиясын және Қазақстан мен Қырғызстанда осы ұйымның бағдарламалық кеңселерін басқаруға ұсынылған, деп хабарлайды Orda.kz Азаттыққа сілтеме жасап.

Зерттеулерге сәйкес, 55 жастағы Дмитрий Иорданиди – Бельгия мемлекеттік қауіпсіздік қызметі шпиондықпен айналысып жүр деп айыптаған соң 2023 жылы Брюссельден кетіп қалған ресейлік 20 дипломаттың бірі. Оның аты-жөні Бельгия барлаушылары жасаған тізімде бар. Жария түрде толық аты-жөні аталмаған ресейлік бұл дипломаттар осы елдің сыртқы барлау қызметіне және оның әскери барлау басқармасына (ГРУ) қатысы болған.

Ал Дмитрий Иорданиди ресейлік 20 дипломат арасында персона нон грата деп танылмаған жалғыз адам. Дереккөздің айтуынша, Бельгия Ресейге «бұл адамды алып кетпесеңдер оны персона нон грата қатарына қосамыз» деп ескерткен, содан соң Мәскеу оны кері қайтарған.

Иорданиди Бельгия астанасында жария түрде ұзақ жүрмеген. Дегенмен ол негізінен Балқанда өткен дипломатиялық карьерасының арасындағы үзілісте 2023 жылы белгілі бір уақытқа барып кеткен тәрізді.

Енді Мәскеу Иорданидиді штаб-пәтері Венада орналасқан көпжақты халықаралық ұйым – ЕҚЫҰ-ға басшы қызметке ұсынып жатыр. Ресей, сондай-ақ, оны ЕҚЫҰ-ның Астанадағы өкілдігінің бағдарламалық кеңсесі басшысы қызметіне және Бішкектегі дәл сондай қызметке ұсынған.

Иорданиди де, Ресейдің Брюссельдегі елшілігі де жағдайға байланысты комментарий беру туралы өтінішке жауап бермеді.