ШҚО-да тағы төрт аудан жеке уақыт белдеуіне көшті

ШҚО-да Зайсан, Күршім, Тарбағатай, Самара аудандандарының тұрғындары 5 наурыздан бастап жұмыс күнін бір сағат ерте бастайды, деп хабарлайды Orda.kz. 

Еске салайық, бұған дейін Шығыс Қазақстан облысындағы Марқакөл және Үлкен Нарын аудандарының тұрғындары 24 ақпаннан бастап жеке уақыт белдеуіне көшкен еді. Енді Марқакөл және Үлкен Нарын аудандарында жұмыс күні сағат 08:00-де басталып, 17:30-да аяқталады, түскі үзіліс 12:00-ден 13:30-ға дейін. Мұндай кесте жұмыс істейтін тұрғындар күндізгі уақытты тиімді пайдалану үшін енгізілген, өйткені аймақта ерте күн шығып, ерте күн батады.

Шығыс Қазақстан облысы Тарбағатай ауданының әкімі Дархан Жөргекбаевтың айтуынша, жұмыс уақытын бір сағат бұрын бастау идеясын 28 ауылдық елді мекеннің тұрғындары қолдаған. 

Зайсан ауданының әкімі Аэлита Ахметсәлімқызының айтуынша, бұл бастаманы халықтың 100 пайызы, әсіресе, жұмыс күні сағат 09:00-де басталатын мемлекеттік қызметкерлер қолдапты.

Айта кетейік, Зайсан ауданында тоғыз әкімшілік-аумақтық бірлік, оның ішінде Зайсан қаласы, сегіз ауылдық округ, 33 елді мекен бар, мұнда 35 219 адам тұрады.