Шиеліде 15 жастағы қыздың некесін қиған имам жауапқа тартылды ма?

Өткен жылы Шиелі ауданында имамның 21 жастағы ауыл тұрғыны мен 15 жастағы мектеп оқушысының некесін қиғаны туралы ақпарат қоғамда қызу талқыға түсті, деп хабарлайды Orda.kz.

Бұл оқиға діни қызметкерлердің заң талаптарын сақтау мәселесін қайта көтерді.  

Заңсыз неке және оның салдары

Қызбен жыныстық қатынасқа түскен ауыл тұрғынына сот 12 жыл бас бостандығынан айыру жазасын тағайындады. Ал заңсыз неке қиған имамның әрекеті қалай бағаланды?  

Қызылорда облысының бас имамы Дастан Құрманбаевтың айтуынша, бұл жағдай туралы жергілікті полиция басқармасынан хабарлама түскен. Имамның куәліксіз неке қиғаны белгілі болғаннан кейін ол тәртіптік кеңеске шақырылды.  

«Куәліксіз неке қию – заңға қайшы әрекет. Имам түсініктеме беру барысында қыздың анасының өтініші бойынша, екі жақтың да келісімімен әрекет еткенін айтты. Алайда бұл оның жауапкершілігін төмендетпейді», – деді Құрманбаев.

Тәртіптік кеңестің шешімі бойынша, имамға қатаң сөгіс берілді. Сонымен қатар, оған діни қызмет талаптарын бұзған жағдайда жұмыстан босатылатыны ескертілді.  

Имамдарға ескерту

Осы оқиғадан кейін Қызылорда облысының барлық имамдары қатысқан жиналыс өтті. Жиын барысында діни рәсімдерді заңға сай жүргізу міндеттері қайта түсіндіріліп, куәліксіз неке қиюға қатаң тыйым салынатыны айтылды.