Шетелдікті жұмысқа алған әуе компаниясына айыппұл салынды

Қазақстандық әуе компаниясына шетелдікті жұмысқа алғаны үшін 2 млн теңге айыппұл салынды, деп хабарлады Көліктегі полиция департаментінің баспасөз қызметі.

«Көші-қон полициясы қызметкерлері 1980 жылы туған Өзбекстан Республикасының азаматын шетелдік жұмыс күшін тартуға рұқсатта көрсетілген лауазымға сәйкес келмейтін жұмысқа қабылдау фактісін анықтады. Басшылыққа қатысты әкімшілік хаттама толтырылды. Олар Әкімшілік құқық бұзушылық туралы кодексінің 519-бабы бойынша 700 АЕК (2 041 900 теңге) көлемінде айыппұл төлеуге міндеттелді» деді ҚР Ішкі істер министрлігі Көліктегі полиция департаментінің өкілі Оңал Бекиев.

Өзбекстан азаматы да әкімшілік жауапкершілікке тартылды. Ол 25 АЕК (73 000 теңгеге жуық) төлеуі керек.

Полиция департаментінде нақты қай әуе компаниясы жазаға тартылғаны айтылмаған.