Шетелдіктер Меккеге қажылық жасай алмайды

Былтырғыдай пандемия жағдайына байланысты Сауд Арабиясының билігі биыл Меккеге қажылыққа барушылардың санын шектеу туралы шешім қабылдады.

Бұл туралы Orda.kz. хабарлады.

Сауд Арабиясы тұрғындары ғана қажылық жасай алады, сонымен қатар олардың барлығы COVID-19-ға қарсы вакциналаудан өтуі керек. Оның үстіне қажылардың саны 60 мың адамнан аспауы тиіс.

Жаңа ережелерді Сауд Арабиясының қажылық және умра істері министрлігі жариялады. Қажылыққа қатысушылардың барлығы 18 бен 65 жас аралығында және созылмалы аурулары жоқ болуы керек.

— Биыл, мұсылман күнтізбесі бойынша 1442 жылы коронавирустық пандемияға байланысты патшалықтың азаматтары мен тұрғындары арасынан 60 мыңнан аспайтын адам қажылыққа бара алады, - делінген құжатта.

Қажылық және умра министрлігі өз мәлімдемесінде корольдіктің адамдардың денсаулығы мен қауіпсіздігін бірінші орынға қоятынын мәлімдеді.

Сауд Арабиясында Pfizer-BioNTech, AstraZeneca, Johnson & Johnson және Moderna екпелері ресми түрде бекітілген.

Қасиетті жерлерге бару үшін тағы бір жыл күтпеймін десеңіз, қажылыққа жұмсайтын ақшаны мұқтаж жандарға таратып беруге болады.