Шетелдік инвесторлар еліміздегі жаңа жобаларды іске қосуды талқылады

Қазақстан Республикасының Премьер-Министрі Әлихан Смайылов Harmony Capital Strategy AMC, Citius Capital AG, Torkam Holding және Marsel Group компанияларының басшыларымен кеңес өткізді, деп хабарлайды Orda.kz.       

Отырыс орталық мемлекеттік орган басшыларының қатысуымен өтіп, тұрғын үй және медициналық мекемелер құрылысы, жаңартылатын энергия көздерін дамыту, көлік инфрақұрылымын жақсарту және т.б. жобаларды іске асыру мәселелері талқыланды.

Әлихан Смайылов үкіметтің елдегі бизнес-климатты жақсартуға жоғары көңіл бөліп отырғанын және жаңа инвестициялық бастамаларға ашық екенін баса айтты.

«Біз сіздердің Қазақстанда жобаларды жүзеге асыру ниеттеріңіз бен бастамаларыңызды құптаймыз», - деді Премьер-Министр.

Өз кезегінде делегация басшысы, Harmony Capital Strategy AMC негізін қалаушы және Citius Capital AG бас директоры Каспар Вонлих жоспарланған жобалар бойынша белгілі бір дайындық жұмыстары жүргізілгенін атап өтті.

«Біз жұмыс бойынша кездесулер өткіздік, бірнеше рет аймақтарға бардық және Қазақстанда инфрақұрылымдық жобаларды қаржыландырудың әлеуеті өте зор деп есептейміз», - деді ол.

Кездесу қорытындысы бойынша Әлихан Смайылов мемлекеттік органдарға инвесторлармен ынтымақтастықты одан әрі дамыту үшін көтерілген барлық мәселелерді зерделеп, пысықтауды тапсырды.