Шерзаттың отбасының үйіне қасақана өрт қойылды: Бас прокуратура мәлімдеме жасады

 Қазақстанның Бас прокуратурасы Талғарда кісі қолынан қаза тапқан жасөспірім Шерзат Болаттың отбасына тиесілі үйді шарпыған өртті қасақана қойылған деп атады, деп хабарлайды Orda.kz.

Қазанның 12-сі күні онсыз да баласынан айырылып қан жұтып отырған қаралы отбасының үйіне өрт қойылды. Жылағанға жұдырық болып, зардап шеккендердің үйі өртенгеннен кейін Бас прокуратура істі өз қолына алып, басшылық шешімімен қылмысты ашу үшін ведомствоаралық жедел-тергеу тобын құрды.

«Қылмыскерлерді әшкерелеу үшін барлық шаралар қабылданатын болады. Қылмыстық іс ҚР Бас Прокурорының бақылауына алынды», деп хабарлады ведомство.

Бұған дейін қаза болған жасөспірімнің әкесі Қаржаубай Нұрымов отбасын біреулер қорқытып жатқанын айтқан болатын. 12 қазанға қараған түні қайтыс болған жасөспірімнің ата-анасының үйі өртеніп кетті. Полиция қыршын кеткен жасөспірімнің отбасын тәулік бойы күзетке алғанын мәлімдеді.