Шерзаттың өлімінен кейін де тәртіп орнамады ма?

Шерзат Болаттың өлімінен кейін де құқық қорғау органдарының жұмысы күмән тудырып отыр. Белсенділердің айтуынша, Талғар уақытша ұстау изоляторынан (УҰИ) қылмыскер қашқан кезде, осы изоляторларға жауапты облыстық Әкімшілік полиция басқармасының басшылары кемі сөгіс алған шығар деп күтілген. Бірақ сол жағдай қандай да бір сабақ болды ма?

Енді Есіктегі уақытша ұстау изоляторында даулы жағдай қайталанып отыр. Белсенділердің сөзіне сенсек, Шерзатты өлтірді деп айыпталғандар еш алаңсыз отыр. Демек, бұл жүйенің жұмысында салғырттық бар немесе жемқорлық жайлаған. Қалай болғанда да, мұндай оқиғалар жауапсыз қалмауы керек.

Әкімшілік полиция басқармасының бастығы Еркебұлан Ахметов, оның орынбасары Ұлан Сағындықов, куратор Салтанат Қожаева неге жауапкершіліктен тыс қалып отыр? Белсенділер бұл сұраққа жауап іздейді.

 Сонымен қатар, Салтанат Қожаеваның ағасы бұрынғы Ішкі істер вице-министрі, қазіргі Сенат депутаты Марат Қожаев екені белгілі. Дегенмен, белсенділер Ішкі істер министрі әділ шешім қабылдайды деп үміттенеді.

Пікір иесі: журналист Асқарбек Қазанғап