Шерзаттың өліміне кінәлілердің бәрі топ болып жазалануы керек — Перизат Нұрымова

Бүгін Талдықорған қаласында 16 жасар Шерзат Полаттың өліміне қатысты сот отырысы өтіп жатыр. Сот алдында тілшімізге марқұмның әпкесі кінәлілердің бәріне тобымен ауыр жаза берілуін талап ететінін айтты, деп хабарлайды Orda.kz.

Айта кетейік, 4 қазан күні Алматы облысының Талғар қаласында қайғылы жағдай болды. «Қамажай» дүкенінің иесі Қаржаубай Нұрымов пен оның ұлы 16 жасар Шерзат Полатпен және бауыры Нұрғанат Ғайыпбаев және дүкенге келген адамдардың арасында жанжал болған. Дау жасөспірім Шерзат Полаттың өліміне ұласты. Дүкен иесінің 16 жастағы ұлы Шерзат Полат пышақ жарақатынан қаза тапты. Жасөспірімді дереу ауруханаға жеткізгенімен, оның өмірін сақтап қалу мүмкін болмады. Бұл оқиға қоғамды дүр сілкіндірді. Қазірдің өзінде көптің назары соттың қандай үкім шығаратынында.

Бүгін сот үкімі оқылар алдында тілшіміз жәбірленуші тараптан пікір алды.

Марқұмның әпкесі Перизат Нұрымова тергеу барысына және ұсынылған жаза мерзімдеріне көңілі толмайтынын айтты.

«Прокурор ұсынған жылдар мені қанағаттандырмайды. Бұлар топтасқан адамдар ретінде сотталуы керек еді. Біздің тараптағы адвокаттар солай сұраған болатын. Не себепті олар бір топ адам болып келіп, бірақ сотқа келгенде бөлек-бөлек жылдар сұрап жатыр. Олар топпен жазалануы керек», — деді Перизат Нұрымова.