«Шерзаттың өлімі»: Дүкендегі камера түсірген толық бейнежазба жарияланды

Талғарда дүкеніне келіп, 16 жасар ұлы Шерзатты өлтіріп кеткен бұзақыларға әділ сот жүргізуді талап өтіп жүрген Қаржаубай Нұрымовтың сол күнгі бейнежазбасы шықты, деп хабарлайды Orda.kz.

Бейнежазбаның толық нұсқасын жариялаймыз. 

Бейнежазбада Қаржаубай Нұрымов дүкенінде отырғанда бейтаныс көк кепка киген ер адам сыра алып, телефонындағы чекті көрсетіп жатыр.

Қайталап көрсетеді. Сосын олардың жұдырықтарын түйістіріп тату кетіскенін көреміз. Сырасын алып бейтаныс адам дүкеннен шығып кетеді.

Сәлден соң қайта келіп тағы бір сыра алады. 

Алайда осы жерден бейне үзіліп кеткен. 

Ер адам телефонмен сөйлесем дегендей ишарат білдіріп сыртқа шығып кетеді.

Артынша ол камераға көрінбейтін жерге кіріп кетіп, еңкеңдеп шығады. Соққы алған адамдай. Сосын Қаржаубай дүкеннен су құйылған бөтелке алып шығып, оның бетін жууға көмектеседі. 

Артынша дүкеннің ішіндегі бейнежазба көрінеді. Онда басқа бейтаныс ер адам кассаға дейін Қаржаубай мен ұлымен бірге еріп кіреді. Артынша тағы бейнежазба үзіліп сырттағы көрініс көрінеді. Онда ашулы Қаржаубай Нұрымов пышақ ұстаған күйі бір топ адамға ұмтылып жатыр.

Шерзат оны тоқтатуға тырысады. Екінші бейтаныс адам оған бірдеңе түсіндірген болады.

Артынша дүкенге ішінде екі әйел бар бір топ кіреді. 

Қаржаубайдың алдындағы бейтаныс адам екі қолын жайып оны сабырға шақырғандай ишарат жасап тұр. Сол кезде екінші бейтаныс адам оны бір-ақ тебеді. 

Осы жерден бейнежазба тағы да үзіліп кетеді.

Қаржаубайдың телефонын ұстап тұрғаны көрініп, ал қалған адамдар көрінбей қалады. 

Қаржаубай Нұрымов біреуге қоңырау шалады. Бейтаныс үш адам қасында жүреді. Олар камераға көрінбейтін жерге кіріп кетеді. 

Бір қыз бен жігіттің сенделектеп құшақтасып арғы бұрышқа кеткені көрінеді.

Кенет екі ер адамның және әйелдің шегіншектеп, соққыдан қорғанғаны көрінеді. Шерзат оларға жұдырық сілтейді. Арғы бұрышқа қызбен бірге кеткен жігіт Шерзат жаққа, камера түсірмейтін жаққа жүгіріп кетеді.

Еске сала кетсек, осы бейнежазбадағы Қаржаубай Нұрымовтың пышақ ұстаған жері желілерге таралып кеткен болатын. Бұған Шерзаттың әкесі «жоғалып кеткен бейнежазбаны қайта, кесіп өздеріне ыңғайлы» жерлерін таратты деп наразы болды. Ол «пышақ ұстап келген адамдардың алдына қалам ұстап шықпайтын шығармын» деген уәж айтты. Сонымен қатар ол егер сот әділ өтпесе, басқа мемлекетке кететінін мәлімдеді.