Шерзат Полаттың жылдық асы өтті: Талғарда Шерзаттың атына көше берілуі мүмкін

Талғарда 2024 жылы кісі қолынан қаза тапқан 16 жастағы Шерзат Полаттың жылдық асы берілді. Болашақта Талғарда Шерзат атымен көше аталуы мүмкін деп хабарлайды, Orda.kz.

Елімізде кеңінен резонанс алып, көпшілікті бей-жай қалдырмаған Шерзат Полаттың қазасына да көзді ашып-жұмғанша бір жыл өте шықты. Аста марқұм Шерзаттың ет жақын туыстары мен осы іс бойынша Талдықорғанда Шерзаттың әкесі Қаржаубай Нұрымовтың құқығын қорғаған заңгерлер де келді.

Имам марқұмға құран бағыштап болған соң дастархан басында заңгер Мейірман Шекеев сөз алды. Заңгер оқиға болған Менделеев немесе Шота Руставели көшелерінің бірін Шерзат Полаттың атымен атауды Талғар әкімдігіне ұсынғанын айтты. 

«Шерзат ақын не жазушы емес, дегенмен де біздің қоғамды оятып кеткен бірден бір тұлға деп атауға болады. Сондықтан Талғар әкіміне Менделеев немесе Шота Руставели көшелерінің бірін Шерзаттың атымен атауды ұсындым.  Енді ары қарай тілек-дұғада болайық, сол көшенің аты Шерзаттың атымен аталса, ол ешқашан ұмытылмайды деп ойлаймын», — деді Шекеев.

Еске сала кетейік, 2024 жылы 4-қазанда бір топ жігіттің қолынан қаза тапқан 16 жастағы жасөспірімнің соты екі ай бойы Талдықорғанда өтті. Ұсталған 9 күдіктіге 1,5 жылдан бастап 23 жыл аралығында бас бостандығынан айыру үкімі шықты.