Шерзат Полаттың өлімінен кейін қызметінен босатылған вице-министр көлік полициясын басқарды

Айдос Рысбаев Ішкі істер министрінің бұйрығымен жаңа қызметке тағайындалды, деп хабарлайды Orda.kz.

Ішкі істер министірлігінің мәліметінше, Рысбаев президент әкімшілігінің келісімімен көлік полициясы департаментінің бастығы болып тағайындалған.  

«Айдос Рысбаевтың басшылық қызметте мол тәжірибесі бар, бұған дейін ішкі істер министрінің орынбасары қызметін атқарған және бөлімді тиімді басқаруға қажетті қасиеттерге ие», – деп хабарлады ІІМ.  

Айдос Рысбаев ішкі істер министрінің орынбасары қызметінен 2024 жылғы 18 қазанда кеткен болатын. Ол бұл қызметте небәрі 11 ай жұмыс істеді. Президент күштік құрылымдардағы ауқымды кадрлық ауыс-түйістер кезінде қызметтен босатқан шенеуніктердің бірі болды.  

Сонымен қатар, Рысбаевтың қызметтен кетуі Талғарда 16 жастағы Шерзат Полаттың өліміне қатысты даумен тұспа-тұс келген болатын.