Шерзат Полат ісі: Сот шешімі өзгерген жоқ

Алматы облыстық сотында Шерзат Полат ісі бойынша сотталғандардың апелляциялық шағымы қанағаттандырылмады, деп хабарлайды Orda.kz.

Сот процесіне Досымбек Қалдырбек, Марина Мұсабекова және Ербол Құтпанбаевтардан құралған судьялар алқасы төрағалық етті.

«Сот үкімінде барлық дәлелдерге тиісті баға берілген, сотталғандардың іс-әрекеттері дұрыс сараланған, оларға заңды әрі әділ жаза тағайындалғандықтан бірінші сатыдағы соттың үкімі өзгеріссіз қалады. Сонымен қатар азаматтық талап-арызға қатысты сот дұрыс шешім қабылдады. Моральдық шығын әр істің салмағына қарай белгіленеді, сондықтан оның да белгіленген мөлшері заңды», –  деді Досымбек Қалдырбек.

Сондай-ақ, Дана Жақсыгелді, Эльмира Нұрбекова, Юлдаш Розбакиев пен Арлан Қазыкеновке қатысты бірінші сатыдағы соттың жеке қаулысы да сол қалпы қалды.

Бұл дегеніміз, алдағы уақытта аталған төрт куәгердің іс-әрекеттерінде қылмыстық құрам бар ма, жоқ па, соны тергеу анықтайтын болады.

Бұған дейін бірінші сатыдағы сот: 

• Абзал Шынасыл — 23 жылға сотталды. Оған Шерзат Полатқа пышақ сұғып өлтірді деген айып тағылды.
• Рәвиль Сакиев — 20 жыл алды оған бұзақылықпен қатар кісі өлтіруге оқталу айыбы тағылды.
• Азамат Тоқтаубаев — 15 жыл, ал Нұркияс Ильясов — 9 жылға бас бостандығынан айырылды.
• Шыңғыс Белғожаев, Дархан Асқентаев, Нұрбол Тоқтаубаев пен Дидар Қалиахмет бұзақылық үшін әрқайсысы 7 жылға сотталды.
• Ал кәмелетке толмаған Думан Ысқақ қылмыс туралы хабарламағаны үшін 1,5 жылға жазаланды. Қазіргі уақытта Ысқақ жазасын өтеп шықты. 

Сот шешімі оқылған соң, сотталғандардың бірі Дидар Қалиахметтің әкесі Еркін Қалиахмет журналистерге Жоғарғы сотқа шағымданбақ ниеті бар екенін айтты.

Фото: Orda.kz

«Кассацияға береміз одан да нәтиже шықпаса тағы шағымданамыз. Егер менің баламның шынымен де кінәсі бар болса мен апелляцияға да бермес едім. Дидардың ешқандай дәлелденген кінәсі жоқ. Сотта Қаржаубай төбелестің арасынан, не қолынан қару көрмегенін  айтты. Балам ол төбелескен топтың ішінде болған жоқ, бар болғаны ол моншадан шығып, дүкенге сыра алуға барды. Оның кінәсі жоқ болғандықтан да соңына дейін барамыз », – деді Дидар Қалиахметтің әкесі.