Шерзат ісі: Судья екі куәгер қызға айып тағудан бас тартты

Талдықорғандағы Шерзат Полаттың өліміне қатысты бүгінгі сот отырысында кеше көрсетілген, күдіктілер отырған көліктің бейнетіркегішіндегі жазбаның стенограммасы оқылды, деп хабарлайды Orda.kz.

Осы көлікте болған екі куәгер қызға байланысты адвокат Мейірман Шекеев судьядан Эльмира Нұрбекова мен Дана Жақсыгелдіге қатысты жеке қаулы шығаруды сұрады.

«Эльмира Нұрбекова сотта қасақана жалған айғақ бергені және аса ауыр қылмыс туралы хабарламағаны үшін жеке қаулы қабылдап, оны тиісті процестік шешім қабылдау үшін Алматы облысының прокурорына жолдауды сұраймыз. Дәл осындай өтінішті Дана Жақсыгелдіге де қатысты сұраймыз», – деді адвокат Шекеев.

Мемлекеттік айыптаушылар бұл мәселе бойынша өз пікірлерін жарыссөз кезеңінде білдіретінін айтты. Ал судья Ержан Жанұзақов қорғаушының өтінішін қанағаттандырудан бас тартты.

Шерзат Полат ісінде жәбірленуші тараптың адвокаттары Арлан Қазакеев пен Юлдаш Розыбакиевті жалған куәлік берді деп тануды сұрады.

Адвокаттың айтуынша, бұған дейін олар ештеңе білмейміз деген, алайда Land Cruiser Prado көлігіндегі видеотіркегіштен олардың әңгімені естіп, сұрақ қойғаны анық естілген. Сол себепті қорғаушы бұл куәгерлерге қатысты жеке қаулы шығаруды сұрады. Судья төрт куәгерге қатысты шешімді кеңесу бөлмесінде қабылдайтынын айтты.

Бұдан бөлек, жәбірленуші тараптың адвокаттары Нұрғанат Ғайыпбаевтың алғашқы жауап беру сәтіндегі бейнежазбасын дәлел ретінде іске тіркемеу туралы өтініш білдірген еді. Алайда судья Жанұзақов бұл өтінішті кейінге қалдырды. Еске салайық, сол бейнежазбада Нұрғанат өзіне және Шерзатқа пышақ салған екі адамды атаған болатын.