Шенеуніктерге заңсыз берілген пәтерлер қайтарылды

Шенеуніктерге заңсыз берілген пәтерлер қайтарылып, Талдықорғанда кезекте тұрғандар арасында үлестірілді.

Талдықорған қаласында бұрын мемлекеттік қызметкерлер мен өзге де тұлғаларға заңсыз берілген 14 пәтер қайтарылып, кезекте тұрғандарға үлестірілді. Бұл туралы Талдықорған қаласы әкімдігінің Instagram желісіндегі ресми аккаунты хабарлады.

Бұған дейін Талдықорған әкімі соңғы бес жылда мемлекеттік қордан 1000-нан астам пәтер мен үй заңсыз берілгенін хабарлаған болатын. Кеше белгілі болғандай, қазірдің өзінде 14 пәтер мемлекет меншігіне қайтарылып,  баспана кезегінде тұрған қала тұрғындарына үлестірілді.

— Алдағы уақытта барлық қайтарылған пәтерлер Қазақстан Республикасының қолданыстағы заңнамасы аясындағы бұйрыққа сәйкес,  қаламыздағы кезекте тұрғандар арасында бөлінеді. Бұл бағыттағы жұмыстар тұрақты бақылауда және жалғасын табады, - деп сендірді әкімдік.

Сондай-ақ,  басқарма  Жетісу облысы прокурорының орынбасары мен Талдықорған прокуроры тұратын пәтерлерді тексергендерін де айтты.

 — Айта кетейік, бұл пәтерлер қала әкімдігінің балансында және жекешелендіру құқығы жоқ қызметтік пәтерлер. Қызмет көрсету тоқтатылғаннан кейін пәтерлер прокуратураның жаңадан тағайындалған қызметкерлері арасында қайта бөлінетін болады, - дейді әкімдіктегілер.