Шенеуніктер үлестірген мектеп формасы дау тудырды

Түркістан облысында аз қамтылған және көпбалалы отбасыларға ересек адамдарға арналған киімдер үлестірілген. Оқушыларға берілген костюм-шалбар мен аяқ киімдердің өлшемі әлдеқайда үлкен. Осыған ренжіген отбасы әкімдікке барған.

Бұл туралы Orda.kz ktk.kz сайтына сілтеме жасап хабарлайды

7 баласын жетектеген ана бюджеттен бөлінген қаржыға кедей-кепшікті келеке қылған шенеуніктерге өкпесін жеткізді. Тіпті тізеге түсетін костюм мен қолқылдаған аяқ-киімді киіп көрсетті.

Балдақсыз жүре алмайтын 1-ші топтағы мүгедек Гүлшат Вафаеваның 10 баласы бар. Оның 7-уі мектеп жасында. Сабаққа киетін киімді мемлекеттің өзі әпереді деген соң биыл білім бөліміне келіп, ұл-қызының өлшемдерін берген екен. Бірақ, 1-ші қыркүйек күні түнде келген киімдерді көргенде қорлыққа шыдамай, жылап жібердім дейді.

— Қорлық емей не айтыңызшы, 1-ші қыркүйек күні балалар мектепке бара алмады. Мен 1-ші қыркүйекті осы жерде аудандық әкімшілікте өткіздім. Бірінші, алғашқы қоңырауына балам 1-ші сыныпқа баруы керек еді, - деді Гүлшат Вафаева.