Шенеуніктер бюджеттің 195 мың теңгесіне қолшатыр сатып алды

Ақтөбе облысы әкімшілігінің 50 дана қара түсті қолшатыр сатып алғаны туралы хабар қазақстандықтарды қатты ашуландырды. Желі қолданушыларына шенеуніктердің оларды бюджет ақшасына сатып алып жатқаны ұнамады.

Облыс әкімдігінің басшылығы Диапазон басылымына түсініктеме берді. Оның айтуынша, қолшатырлар ресми делегациялардың қажеттіліктері үшін тендер арқылы сатып алынған.

Белгілі болғандай алғашқыда қолшатыр сатып алуға жарты миллионға жуық теңге қарастырылған, бірақ жеңілдікпен олар шенеуніктерге 195 мың теңгеге түскен.

«Бұл қолшатырлармен міне жақында премьер-министр келді, соны қарсы алдық. Делегацияны біз күтіп алдық. Әрине, ауа-райына байланысты. Олар тек ғимарат ішінде жүрмейді ғой. Олар нысандар мен алаңдарды аралайды. Сондықтан қолшатырлар жиі сынады», - деді Ақтөбе қаласы әкімдігі аппараты басшысының міндетін атқарушы Мейрам Әуелбеков.

Жергілікті және іс-сапармен келген шенеуніктерге арналған қолшатырлар 3 жыл қолданылуы керек. Кейін оның орнына жаңасын сатып алады.