«Шенеунік жазаланды»: Қызметтік көлікті айдап кеткен шенеуніктің ұлы қамалды

Ақтөбе облыстық орман шаруашылығы және жануарлар әлемі аумақтық инспекциясының басшысы Әділкерей Әуелбаев ұлының тәртіпсіздігі үшін жазаға тартылды, деп хабарлайды Orda.kz.

Time.kz газетінің ақпаратына сүйенсек, 32 жастағы Бауыржан Сағидоллаев әкесінің қызметке арналған Toyota көлігін мас күйінде жүргізіп, Ақтөбеде тәртіп сақшыларының қолына түскен.

Сағидоллаев 15 тәулікке қамауға алынып, 7 жылға жүргізуші куәлігінен айырылды.

Шенеуніктің өзі де қызметтік көлікті жеке мақсатта пайдаланғаны үшін әдеп кеңесінің алдында жауап берді. Әуелбаев оқиға болған сәтте демалыста болғанын және басқа қалада жүргенін мәлімдеді. Алайда, бұл сылтау оны тәртіптік жазадан босатпады. Өйткені, кеңесте атап өткендей, қызметтік көліктер тек мемлекеттік қажеттіліктер үшін пайдаланылуы тиіс.