Шекарадағы екі вокзалдың басшылары жұмыстан босатылды

Қаржы министрі Ерұлан Жамаубаев пен «Қазақстан темір жолы» ұлттық компаниясының басшысы Нұрлан Сауранбаев «Қорғас» АЭА-ға келді. Салдарынан теміржол вокзалының екі басшысы қызметінен кетті. Бұл туралы ҚТЖ баспасөз қызметі хабарлады.

Жамаубаев пен Сауранбаев KTZE-Қорғас шлюзі құрғақ портының, «Нұр жолы» және «Алтынкөл» өткізу бекеттерінің жұмысын тексергені хабарланды.

«Жұмыс сапары барысында сыртқы экономикалық қызметке қатысушылармен кездесу өтіп, онда Қазақстан-Қытай шекарасында бизнес жүргізудің ашықтығын арттыру мәселелері талқыланды.

Сапар нәтижесінде Достық және Алтынкөл шекаралық теміржол стансаларының басшылары қызметтерінен босатылды» деп хабарлады баспасөз қызметі.

Еске салсақ, 11 қаңтарда Мәжіліс отырысында президент Қасым-Жомарт Тоқаев Қытаймен арадағы кедендік шекарадағы «бейберекеттікті» шешуді тапсырған.