Шекарада тұрып қалған қазақстандықтар үшін жасыл дәліз ашылады

Қазақстан үкіметі қазақстандықтар үшін жасыл дәліз бен шекарада тұрып қалған азық-түлік көліктері үшін Ресеймен келіссөздер жүргізуде.

Жасыл дәліз қазан айына дейін жұмыс істейді.

«Кеше мен әріптесім, Ресей Федерациясы премьер-министрінің орынбасарымен сөйлестім. Өйткені шекараның арғы жағында қиналған қазақ азаматтары мен азық-түлік тиелген жүк көліктері де бар. Бүгін шекара қызметтері өзара сөйлеседі. Жасыл дәліз беруге тырысамыз. Мұны бүгін, ең әрісі ертең жасау керек деп ойлаймын. Енді шекара қызметімен сөйлесеміз» деді вице-премьер Жұманғарин Сенат отырысында.

Еске салсақ, Ресейде жартылай жұмылдыру жарияланғаннан кейін ресейліктер жаппай елден кете бастаған. Қазақстан-Ресей шекарасында республикаға кіруге ниет білдірушілердің бір шақырымға созылған кезегі пайда болды. 21 қыркүйектен бері Қазақстанға 100 мыңға жуық Ресей азаматы кірсе, оның 65 мыңға жуығы елден шығып кеткен.