«Шашың түсіп қалған, ақымақсың»: Ернар Жиенбай үкімге наразы екенін айтты

Шымкент қаласы әкімінің орынбасары Руслан Берденовке қастандық жасаған Ернар Жиенбай 9 жылға сотталды. Сот залынан шығарда ол журналистерге қарап, Берденовке қатысты «Намысымды таптады» деді, деп хабарлайды Orda.kz.

Үкім жарияланған соң сот залында Жиенбай өз пікірін білдірді.

«Үкіммен келіспеймін. Мен оны өлтіргім келген жоқ. Менің ісім 106-бап бойынша, яғни адам денсаулығына қасақана ауыр зиян келтіру ретінде қаралуы керек. Нақтысында биологиялық өлім болған жоқ, тек денсаулығына зиян келді. Біріншіден, себепсіз шақырылдым, жағамнан алды, қасындағы көмекшілері көрді, бірақ ешкім айтпайды. Екінші, онымен кездесуге барғандағы мақсатым – ұрыс-керіссіз кешірім сұрау еді. Ол "Шашың түсіп қалған, ақымақсың", деді. 21 сәуірде әкімшілікке өзім бармадым, ол мені шақырды», – деді Жиенбай.

Бұған дейін Берденовке бес рет оқ атқан, оның үшеуі тиген Жиенбай 9 жылға сотталды,  мемлекеттік айыптаушы 11 жыл 3 ай сұраған болатын. Сонымен қатар, бүгін үкімді күні кеше ғана ғаламторда талқыға түскен Әбинұр Қарабаев оқыды. Ол осыған дейін сот залында журналист Ботагөз Омароваға тілін көрсеткен болатын. 

Ол апелляциялық шағым жазатынын әзірге шешпегенін айтты.

Еске салайық, 21 сәуірде Жиенбай Берденовке әкімдік ғимаратының жанында бес рет оқ атқан, оның үшеуі Берденовке тиген. Жәбірленушінің қоластындағы қызметкері болған Жиенбай - Шымкент қаласының құрылыс басқармасына қарасты «Тұрғын үй Шымкент» ЖШС-нің бұрынғы директоры.