Шарын шатқалындағы аспалы көпірге 1,5 млрд теңге жұмсалмақ

2025 жылы Алматы облысының Шарын шатқалы аумағында аспалы көпір құрылысы басталады, деп хабарлайды Orda.kz.

Облыс әкімдігінің мәліметінше, көпір өз атауын түсіне байланысты алған «қара шатқал» арқылы өтеді деп жоспарлануда. Құны 1,5 млрд теңге болатын жоба екі жыл ішінде іске асырылмақ. Аймақта 50 жұмыс орны ашылады деп күтіліп отыр. 

Өңір басшылары бұл жоба туристер қатарын көбейтетініне сенім білдірді. Сонымен қатар құрылыс орнына электр желісін жеткізуге 87 млн теңге бөлінген.

Шарын шатқалы – Шарын өзенін 154 шақырым бойлай жатқан табиғи нысан. Шатқал Алматы қаласынан 195 шақырымдай шығысқа қарай орналасқан.