Шартты түрде мерзімінен бұрын босатуды сұраған Қайрат Боранбаев лезде өтінішін қайтарып алды

Қомақты қаржы жымқырып, заңсыз табысты заңдастырғаны үшін сотталған қазақстандық кәсіпкер Қайрат Боранбаев шартты түрде мерзімінен бұрын босату туралы өтініш түсірген еді. Алайда оны дереу қайтып алды, деп хабарлайды Orda.kz.

Айта кетейік, 2023 жылы 31 наурызда сот Боранбаевты мынадай қылмыстық бап бойынша кінәлі деп тапқан:

• «қылмыс жасауға көмектесу» (ҚК 28-бап, 5-бөлік);
• «аса ірі көлемде бөтеннің мүлкін жымқыру» (ҚК 189-бап, 4-бөлік, 2-тармақ);
• «қылмыстық жолмен табылған кірісті заңдастыру, оны бірнеше адаммен бірлесіп жүзеге асыру» (ҚК 218-бап, 3-бөлік, 3-тармақ).

Алайда маусым айының соңында үкімнің күші жойылып, іс апелляциялық тәртіпте, бірінші сатыдағы сот ережесімен қайта қарауға жіберілді. Қыркүйекте апелляциялық тыңдау қорытындысы бойынша Боранбаев кінәлі деп танылып, 6 жылға бас бостандығынан айыру жазасы тағайындалды.

2023 жылғы 6 қарашада ІІМ ҚАЖК Қайрат Боранбаев жазасын өтеу мекемесінен босатылғанын хабарлады. Себебі оның жаза мерзімінің өтелмеген бөлігі бас бостандығын шектеумен алмастырылған. Бұған дейін ол мемлекетке 124 миллиард теңге болатын мүлкі мен ондаған бизнес-активін өткізген болатын.

Сот шешімі бойынша ол тұрғылықты жеріне өздігінен барып, пробация қызметінде есепке тұруы және сол мекеменің бақылауында болуы тиіс еді.

Боранбаевтың шартты түрде мерзімінен бұрын босату жөніндегі өтініші 2 қазанда Бостандық аудандық қылмыстық сотында онлайн-форматта қаралды.

«Сот отырысы барысында сотталған адам өз өтінішін қайтарып алды. Осыған байланысты сот оның өтінішін қараусыз қалдырды», – деді Алматы қалалық сотының баспасөз хатшысы. 

Қайрат Боранбаевтың не себепті өтінішін лезде қайтарып алғаны белгісіз.

Айта кетейік, Orda.kz 20 маусымда кәсіпкер Мұрат Боранбаевтың (Қайрат Боранбаевтың ағасы) ұсталғаны жайлы жазған болатын.